Куда ёзулалынга йѳрээлдер
Куда шайлалгазын ажыдар ѳгбениӊ чижек сѳзү: Өлчейлиг хүннүң мендизи-биле, өргүн чонум! Аныяктарныӊ куда-доюнуң байырлыг олуттарын ээлепкен бүгү чонга, ырактан моорлап келген кудаларымга, бо хүннүң аас-кежиктиг ээлери өгленген уругларымга улуг мөгейиглиг байырымны туттум. Уругларывыстыӊ ѳг-бүле тудуп турар куда шайлалгазыныӊ аксын ажыдып, силер бүгүдени аяк-шайже, аъш-чемни чоогларынче чаладым.
Оолдуң ада-иезиниң йөрээли:
Дөңге тигер өглүг бол, оглум!
Дөъшке чалаар малдыг бол, оглум!
Өгге сыңмас төлдүг бол, оглум!
Аалчы чоннуң көвей болзун, оглум!
Хая дег эттиг бол, оглум!
Торлаа дег өнер бол, оглум!
Бак сөстү бажың ажырып чор, оглум!
Эки сөстү эктиң ажыр салып чор, оглум!
Ада-иезинге дузалыг,
Алыс чонга ады үнген
Эргим чаагай өг-бүле болзун!
Курай-Курай-Курай!
Авазының оглунга йɵрээли:
Азыраан малың ɵзүген болзун!
Ажы-тɵлүң кɵвей болзун!
Барган чериңге
Мактадып чор, оглум!
Четкен чериңге
Чедиишкинниг бол, оглум!
Ажылынга арга-дуржулгалыг бол, оглум!
Амыдыралыңга сундулуг бол, оглум!
Каптагайның чонун кайгадыр челер
Хайыралыг Калчан-Шилгилиг бол, оглум!
Делегейни дескиндир эргип кɵɵр
Дендии күштүг күзелдиг бол, оглум!
Үлегерлиг өг-бүлениң йөрээли:
Соңгу эдээн
Анай, хураганы бассын,
Мурнуу эдээн
Уруг-дарыы бассын!
Торга дег каас,
Торлаа дег өнер,
Маңнап четпес коданныг
Малдап четпес малдыг болзун!
Эдилээни алдын-мөңгүн
Эзертээни чыраа, саяк
Эргим чаагай өг-бүле болзун!
Келин кыстың авазының уруунга йөрээли:
Делегей чечээ дег каас бол, уруум!
Торлаа дег өнер бол, уруум!
Чоорганың чылыг болзун, уруум!
Чоок өөрүң көвейс болзун, уруум!
Үнген, киргениңни хүндүлеп чор, уруум!
Ушкан, турганын тургузуп чор, уруум!
Хараганныг хову кежир кылаштава, уруум
Кокай кончуг эвес бе, уруум!
Ажынгаштың арт ажыр кылаштава, уруум
Адыг кончуг эвес бе, уруум!
Угулза дег чуртталгалыг
Уруг-дарыың көвей болзун, уруум!
Төрелиңге төлептиг бол, уруум
Чонуңга чоргаар бол, уруум!
Аныяктарның даңгыраа:
Күдээ: Аас-кежик долган амыдыралды сеңээ сөңнеп, эки-бакты кады үлежип, ээлдек болгаш бүзүрелдиг эш болур мен деп аазап тур мен.
Келин: Аас-кежик долган амыдыралды сеңээ сөңнеп, эки-бакты кады үлежип, салымымны сээң салымың-биле доңнаштырып, ынакшылым мөңге болурун аазап тур мен.